कल्याण दि.25 डिसेंबर :
अल्पवयीन मुलीचे अपहरण करून तिची हत्या करण्यात आल्याचा धक्कादायक प्रकार कल्याण पुर्वेत उघडकीस आला आहे. या घटनेने कल्याण शहर हादरून गेले असून नागरिकांमध्ये प्रचंड संताप व्यक्त होत आहे. या घटनेप्रकरणी पोलीसांनी एका आरोपीला अटक केली असून दुसऱ्याचा शोध घेण्यात येत आहे. (Minor girl’s murder shakes Kalyan city; One person was arrested by the police and there was anger among the citizens against the incident)
कल्याण पूर्वेतील एका 13 वर्षीय अल्पवयीन मुलगी सोमवारी दुपारनंतर बेपत्ता झाल्याची तक्रार पोलीस ठाण्यात दाखल झाली होती. तर तिच्या पालकांनी दिलेल्या तक्रारीनंतर कोळसेवाडी पोलिसांनी याप्रकरणी अपहरणाचा गुन्हा दाखल केला होता. मात्र त्याचा पोलीस तपास सुरू असतानाच काल सकाळी कल्याण – पडघा मार्गावरील बापगाव गावातील निर्जन ठिकाणी या मुलीचा मृतदेह आढळून आल्याने एकच खळबळ उडाली. या घटनेनंतर नागरिकांनी तीव्र शब्दांत संताप व्यक्त केला आहे.
मुलीच्या वडिलांनी दिलेल्या माहितीनुसार, खाऊ खाण्यासाठी आईकडून पैसे घेऊन ही मुलगी जवळच्या दुकानामध्ये गेली होती. मात्र बराच वेळ होऊनही ती परत न आल्याने पालकांनी पोलीस ठाण्यात बेपत्ता झाल्याची तक्रार दिली होती. शोधण्यासाठी संपूर्ण कुटुंबाने सर्वत्र शोध घेतला. परंतु, ती रात्रीपर्यंत काही मिळून आली नाही. काल सकाळी अचानक कल्याण पडघा मार्गावरील बापगाव येथे या मुलीचा मृतदेह आढळून आला आणि सर्वच जण हादरून गेले आहेत. तर या घटनेनंतर नागरिकांमध्ये असणारा संताप पाहता पोलिसांनीही आपल्या पोलीस बंदोबस्तात मोठी वाढ केली आहे.
दरम्यान या गंभीर घटनेप्रकरणी पोलीसांनी दोनपैकी एका आरोपीला अटक केली असून दुसऱ्याच्या शोधासाठी पथकं रवाना केली असल्याची माहिती कल्याणचे डी सी पी अतुल झेंडे यांनी प्रसिध्दी माध्यमांना दिली आहे. तर या मुलीचा मृदेह शव विच्छेदनासाठी मुंबईतील जे.जे. रुग्णालयात पाठविण्यात आल्याचेही त्यांनी सांगितले.
