कल्याण दि.10 मे :
विविध मागण्यांसाठी वारंवार दाद मागूनही शासनाकडून कोणतीच कार्यवाही होत नसल्याच्या निषेधार्थ राज्यातील वीज कंत्राटी कर्मचारी उद्या 11 मे रोजी काळ्या फिती लावून काम करणार आहेत. राज्य वीज कंत्राटी कामगार संघाचे ठाणे जिल्हा अध्यक्ष मनोज मनुचारी यांनी ही माहिती दिली आहे.
महावितरण, महापारेषण आणि महानिर्मिती या 3 ही वीज कंपन्यांत सुमारे 32 हजार कंत्राटी कामगार नियमित रिक्त पदांच्या जागेवर काम करत आहेत. कोरोना काळात या कामगारांनी आपला जीव धोक्यात घालून अखंडित आणि सुरळीत वीजपुरवठा दिला. हे काम करत असताना 40 कंत्राटी कामगारांच्या झालेल्या मृत्यूकडे शासनाने सोयीस्कररित्या दुर्लक्ष केल्याचे मनोज मनुचारी यांनी सांगितले. राज्यात झालेल्या वेगवेगळ्या दुर्घटनांमधील मृतांच्या कुटुंबियांना राज्य शासनाने आर्थिक मदत केली. मग वीज पुरवठ्यासाठी आपला जीव धोक्यात घालून काम करणाऱ्या वीज कंत्राटी कर्मचाऱ्यांना आपल्या 2-2, 3-3 महिने पगारासाठी ताटकळत बसावे लागत असल्याबाबद्दल कामगार संघटनेने तीव्र शब्दांत नाराजी व्यक्त केली.
तर अनेक प्रलंबित मागण्यांसाठी जून 2020 पासून अनेक आंदोलने आणि पत्रव्यवहार करूनही अद्याप ऊर्जा खात्याकडून कोणताही निर्णय झाला नसल्याचे मनुचारी यांनी सांगितले. त्याविरोधात उद्या मंगळवारी 11 मे रोजी राज्यातील सर्व कंत्राटी कर्मचारी काळ्या फिती लावून काम करणार असल्याची माहिती वीज कंत्राटी कर्मचारी संघाचे ठाणे जिल्हा अध्यक्ष मनोज मनुचारी यांनी दिली.
