कल्याण दि.6 एप्रिल :
शासनाने दिलेल्या कोवीड निर्बंधांचे उल्लंघन करत आपल्या मुलीचा शाही विवाह सोहळा आयोजित केल्याप्रकरणी अखेर शिवसेना पदाधिकाऱ्यासह वर गुन्हा दाखल करण्यासह संबंधित मॅरेज हॉलही (ओपन लॉनही) सील करण्यात आला आहे.
कल्याण पश्चिमेच्या काळा तलाव परिसरात गेल्या शनिवारी शिवसेनेचे माजी नगरसेवक सुनिल वायले यांच्या मुलीचा जंगी विवाह सोहळा आयोजित करण्यात आला होता. याठिकाणी कोवीड नियमांचे उल्लंघन केल्याप्रकरणी महात्मा फुले चौक पोलिस ठाण्यात वरिष्ठ पोलिस निरिक्षकांनी आयोजक सुनिल वायले, सुरेश म्हात्रे आणि मॅरेज लॉन्स व्यवस्थापक रमेश लक्ष्मण सिंग यांच्यावर गुन्हा दाखल केल्याची माहिती केडीएमसीतर्फे देण्यात आली आहे. तर कोविड नियमांचे उल्लंघन केल्याप्रकरणी महापालिका आयुक्त डॉ. विजय सूर्यवंशी यांच्या निर्देशानुसार हे दोन्ही लॉन्स प्रभागक्षेत्र अधिकारी अक्षय गुडधे यांच्यामार्फत 30 एप्रिलपर्यंत सील करण्यात आल्याची माहितीही केडीएमसीतर्फे देण्यात आली आहे.
