कल्याण डोंबिवली दि.31 जानेवारी :
विद्यार्थ्यांना विज्ञान विषयामध्ये स्वारस्य निर्माण होण्याच्या उद्देशाने डावखर इन्फ्रा, रिजन्सी ग्रुप, समर्थ पेट्रोलियम, एनए सोल्युशन, डावखर फाउंडेशन आणि डावखर फिल्मस् यांच्या संयुक्त विद्यमाने आंतरशालेय विज्ञान प्रदर्शनाचे आयोजन करण्यात आले होते. 29 आणि 30 जानेवारी 2025 रोजी रीजन्सी अनंतम येथे झालेल्या या विज्ञान प्रदर्शनात विद्यार्थ्यांनी अतिशय कल्पकतेने विज्ञान प्रकल्प सादर केल्याचे दिसून आले. तर या विज्ञान प्रदर्शनासोबतच सुप्रसिद्ध आंतरराष्ट्रीय नाणे आणि नोटा संग्राहक संजय जोशी यांच्याकडील 193 देशांच्या नोटा आणि पोस्टल स्टॅम्पही यावेळी विद्यार्थ्यांना पाहण्यासाठी उपलब्ध करून देण्यात आले होते.
यंदाच्या विज्ञान प्रदर्शनात कल्याण आणि डोंबिवली परिसरातील 53 शाळांनी सहभाग घेत एकाहून एक सरस असे 98 प्रकल्प सादर केले होते. 5वी ते 7वी आणि 8वी ते 10वी अशा 2 गटांमध्ये स्पर्धा झाली. आणि त्यातील विजेत्यांना 1लाख 50 हजारांची रोख बक्षिसे आयोजक कैलास डावखर यांच्या हस्ते देण्यात आली. या विज्ञान प्रदर्शनासाठी पाण्याचा पुनर्वापर, आधुनिक भौतिक- रसायन शास्त्र, आधुनिक जीवनशैलीचे फायदे तोटे, आर्ट अँड क्राफ्ट वर्किंग मॉडल्स, पवन ऊर्जा आणि त्याचा वापर हे विषय तर पोस्टर्स स्पर्धेसाठी श्री रतन टाटा आणि त्यांचा तेजस्वी जीवन प्रवास, पॅरालिम्पिकमधील भारताचा प्रवास, सामाजिक न्याय, भारताची सांस्कृतिक विविधता असे विविध विषय देण्यात आले होते.
विज्ञान प्रदर्शनात 5 ते 7 वी गटात ओमकार इंटरनॅशनल स्कूल सीबीएससी आणि टिळक नगर विद्यामंदिर प्रथम क्रमांक विभागून तर नूतन ज्ञान मंदिर आणि चंद्रकांत पाटकर विद्यालय यांना द्वितीय विभागून आणि डॉन बॉस्को यांना तृतीय तर उत्तेजनार्थ सेंट झोन हायस्कूल तसेच 8 ते 10 वी गटात प्रथम क्रमांक विभागून कोतकर विद्यालय आणि साई इंग्लिश स्कूल यांना देण्यात आला. तर द्वितीय मंजुनाथ विद्यालय आणि श्री चैतन्य टेक्नो स्कूल विभागून आणि तृतीय सिस्टर निवेदिता स्कूल तर उत्तेजनार्थ मातोश्री विद्यालय व गायत्री विद्यालय यांना देण्यात आला.
तर पोस्टर स्पर्धेमध्ये अनुक्रमे 5 ते 7 वी गटात अचीवर हायस्कूल, सेंट जॉन हायस्कूल, बी आर मडवी स्कूल यांनी प्रथम द्वितीय तृतीय आणि 8 ते 10 वी गटात साई इंग्लिश स्कूल, बी टी गायकवाड स्कूल, सिस्टर निवेदिता स्कूल यांनी प्रथम द्वितीय तृतीय क्रमांक मिळवला आहे. तर बेस्ट प्रेझेंटर म्हणून 5 ते 7 वी गटात तिलक नगर शाळेची राधिका वैद्य, शंकरा विद्यालय ची स्वरा तर्वे तर 8 ते 10 वी गटात प्राची झा, श्री चैतन्य स्कूल आणि कृष्णा जाधव, सेंट जॉन स्कूल यांना पुरस्कार मिळाला आहे.
या संपूर्ण स्पर्धेचे सूत्रसंचालन सुप्रसिद्ध निवेदक प्रणव भांबुरे यांनी केले.
