Home ठळक बातम्या प्रशिक्षित ट्रेकर्स, गावकऱ्यांच्या मदतीने हरिश्चंद्रगडावर अडकलेल्या ट्रेकर्सची सुटका

प्रशिक्षित ट्रेकर्स, गावकऱ्यांच्या मदतीने हरिश्चंद्रगडावर अडकलेल्या ट्रेकर्सची सुटका

मुरबाड दि.26 नोव्हेंबर :
हरिश्चंद्रगडावरील कोकणकडा येथे हजार फुटावर अडकलेल्या ट्रेकर्सची सुटका करण्यासाठी महसूल- पोलीस विभागाने इतर प्रशिक्षित व्यावसायिक ट्रेकर्सची मदत घेतली असून आत्तापर्यंत १५ जण या सुळक्यावरून खाली बेस कॅम्प मध्ये आले आहेत. स्थानिक गावकऱ्यांच्या मदतीने ही मोहीम यशस्वी झाल्याची माहिती मुरबाड तहसीलदार सचिन चवधर यांनी दिली. अंधार झाल्यामूळे कल्याणसह इतर ठिकाणचे 20 ट्रेकर्स याठिकाणी अडकून पडले होते.

हरिश्चंद्र गडावरील कोकणकड्याचा ५०० मीटर्सचा सुळका उतरायला या अडकलेल्या ट्रेकर्सनी आज सकाळी सुरुवात केली. हा सुळका यशस्वीरित्या उतरल्यानंतर त्यांना आणखी एक ३०० मीटर्सचा सुळका उतरावा लागला. या सर्वाना टप्प्याटप्प्याने रॅपलिंग करीत खाली यावे लागले. बेस कॅम्प ज्याठिकाणी आहे तिथे बेलपाडा ही आदिवासी वस्ती असून इथे तहसील कार्यालयाने या ट्रेकर्सची वैद्यकीय तपासणी, नाश्ता, जेवणाची व्यवस्था केली. याठिकाणी तालुका अधिकारी डॉ बनसोडे, निवासी नायब तहसीलदार हनुमंत जगताप, पोलीस निरीक्षक चव्हाण तसेच त्यांची टीम काल रात्रीपासूनच थांबली आहे.

या बेस कॅम्पपासून वालीव्हरे गावात या ट्रेकर्सना पायीच जावे लागणार आहे. हे अंतर सुमारे २ ते ३ तासाचे असून नंतर त्या ठिकाणाहून त्यांना मुंबई, ठाणे , मीरा भाईंदर, कल्याण येथे जाण्यासाठी वाहनांची व्यवस्थाही करण्यात आली आहे असे सचिन चवधर यांनी सांगितले. जिल्हाधिकारी राजेश नार्वेकर तसेच निवासी उपजिल्हाधिकारी डॉ शिवाजी पाटील हे सातत्याने या बचाव पथकाच्या संपर्कात असून नगर , कल्याण, ठाणे येथून काही व्यवसायिक ट्रेकर्स ही मदतीसाठी गेले आहेत.
ठाणे जिल्हाधिकारी कार्यालयातील प्रशांत कापडे यांच्या भटकंती एडव्हेन्चर,  सुरेश गिध, शिवदुर्ग या संस्थेचे ट्रेकर्सही हिरीरीने यात सहभागी झाले. आज सकाळपासून सुरु असलेल्या या मोहिमेत प्रशासनाने इतर यंत्रणांशी समन्वय ठेऊन पोलिसांच्या तसेच व्यावसायिक ट्रेकर्सच्या मदतीने केलेल्या कामगिरीमुळे अडकलेले ट्रेकर्स समाधान व्यक्त करीत आहेत.

*#LNN*
*#LocalNewsNetwork*

LEAVE A REPLY

Please enter your comment!
Please enter your name here

*